Museum Martena: it abstrakte en minimalistyske wurk fan Bowe Roodbergen

Bowe Roodbergen

No te sjen yn Museum Martena yn Frentsjer, in oersichtstentoanstelling fan Bowe Roodbergen (Grou, 1954). ‘Myn keunst soene je geometrysk-abstrakt neame kinne, of minimalistysk. Hast al myn wurk is swart of wyt, of beide, in inkelde kear in spatsje kleur. Yn sawol myn platte wurk as yn myn ljochtobjekten komme je werhelling tsjin, myn streven nei perfeksje, nei puerens. Wat oerbliuwt is de estetyk, net de etyk, mar de langstme, de sucht nei it moaie, de flecht yn oandwaning troch ienfâld. Gjin grutte wurden, earder de grutte stilte.’

Roodbergen makket wurken op papier, lampen en oare objekten. Kenmerkjend foar syn wurk is de subtiliteit, it each foar detail en de perfeksje dêr’t er syn kreaasjes mei stal jout. Syn lampen binne makke fan tige útinoar rinnende materialen, fariearjend fan papier en stof oant stiel en hout. Mei minimale en subtile yngrepen wit er op boartlike wize ta aventoerlike kreaasjes te kommen dy’t op ‘e grins balansearje fan gebrûksfoarwerp en byldhouwurk. Bowe: ‘Wêr’t de oarsprong fan myn wurk leit? Wêr’t ik myn ynspiraasje weihelje? Dêr moast ik oer neitinke. Ienkear fotografearre ik. Gjin kleur, mar swart-wyt. In stap ferwidere fan de werklikheid. Ik learde te sjen, te sykjen nei wêr’t it no eins om giet. En geandewei waarden de bylden hieltyd kealer, waarden werombrocht nei flakken en linen. En dat bleau, ek yn myn lettere wurk.’