Hoera, in kado fan Meindert Talma!

Hoera! Meindert Talma (Surhústerfean, 1968) sil it kadoboek foar de Fryske Boekewike 2024 skriuwe. Leafhawwers fan syn gauris autobiografyske boeken fregen har al jierren ôf, wêrom freegje se de âld-Wâldsjonger net?

It parseberjocht giet út op Falentynsdei, en komt mei in ekstra ferrassing: Talma is krekt klear mei in oar manuskript! Dat, meitsje mar fêst wat romte yn de boekekast.

Meindert Talma lit it oargel jammerje yn de Prinsetún, 2014.

Meindert Talma: “Doe’t ik belle waard mei de fraach oft ik it Kadoboek 2024 skriuwe woe, tocht ik: o nee!, want ik wie krekt dwaande mei it dien meitsjen fan myn nije boek. Mar ik ha in soad nocht oan it skriuwen fan it Kadoboek. It wurdt in autobiografyske, tragykomyske novelle, dy’t him foar it grutste part ôfspilet yn Fryslân. En it kriget in frij dramatysk ein.”

It Kadoboek wurdt presintearre op freed 1 novimber by de ôftraap fan it Frysk Boekefeest. It Kadoboek is dêrnei de hiele Boekewike, fan sneon 2 novimber o/m snein 10 novimber 2024, fergees te krijen by oankeap fan in Frysk boek. It Kadoboek fan 2024 wurdt útjûn yn gearwurking mei útjouwerij Regaad.

Wûnderlike karjêre
Yn 1999 debutearre Talma mei de autobiografyske roman ‘Dammen met ome Hajo’, dy’t yn 2022 by útjouwerij Regaad yn it Frysk ferskynde. Twa jier nei syn debút brocht er tegearre mei Nyk de Vries in samling fraachpetearen út ûnder de titel ‘De Blauwe Fedde yn petear’. Yn 2003 ferskynde fan him de roman ‘Kriebelvisje’. Dêrop folgen de dichtbondel ‘Laat het orgel jammeren’ (2011) en de romans mei muzykalbums ‘Kelderkoorts’ (2013) en ‘Je denkt dat het komt’ (2017). Syn oankommende roman hjit fan ‘Gezinsverbijstering’ (septimber 2024). Talma komt as personaazje (“Myn lange skiednisfreon”) ek foar yn de roman Renger (2015, yn it Frysk 2016) fan Nyk de Vries.

De boeken fan Talma binne gauris basearre op syn eigen libben. Syn jeugd yn Surhústerfean, oargelspyljen, damjen, de stúdzjetiid yn Grins en syn wûnderlike karjêre as de minst bekende popstjer fan it lân rinne as in reade tried oer de siden. Fantasy en anekdoates floeie trochinoar yn in styl dy’t tagonklik en meinimmend is, mei in soad typyske humor.

Lêstip foar Talma-begjinners!
Meindert Talma syn debútroman út 1999 ferskynde fia Regaad ek yn it Frysk.

Hajo Talma is in frijgesel en âld-SRV-man, dy’t al syn frije tiid besteget oan it lêzen fan de bibel. De persoan dy’t him it measte om him bekroadet, is syn omkesizzer Meindert, dêr’t er altiten fan wint mei damjen. Ome Hajo is ien fan de kleurrike karakters dy’t yn dizze roman op tragikomyske wize beskreaun wurde.

De roman giet oer it opgroeien yn de jierren ’70 en ’80 yn Surhúster­fean, yn ’e Wâlden. De tiidsgeast, de sfear en de ûnderkuolle humor út dy krite komme yn Damje mei ome Hajo dúdlik nei foarren.

(Bestel alfêst by de Afûk)