Earste ljipaai

JOSSE DE HAAN – 

– foar myn pake Jehannes de Haan, 31 jier op 27/3/’15,

doe’t er ûnder Tsjom yn de Flearen moarns betiid

it earste ljipaai fan Fryslân fûn –

 

 

 

do hast foar my de tiid fermannichfâldige – yn libben hâlden

100 jier bist neaken stim yn ‘t neitinken – gjin lûd en lichem

dyn namme en foto baarnd yn tegels – in ljip, in nêst, in aai

 

do hast de hij foargoed ferrifele – hy kopkerôle oer de five

ferliedest de jok yn de lege laaikes – se joech har skûlplak oan

mei de pols as maat sprongst oer de molier – sykjend each

 

bist in stjurre emoasje yn de famyljestoarje – aaisikerslatyn

ik kin dagen oer dy fantasearje boppe dyn foto – do ljeppend

yn de pet dat noch waarme spikkelaaike – it earste fan dat jier

 

op âlde maaie ferhúzesto fan boer nei boer – yn ‘e ljippehoeke

yn april knipeagest nei dyn kontrakt – fertsjinnest der wat by

ek al sprongen de boeren dy op ‘e hûd – do woest it earste aai

 

no tsjoen ik dy nei krap 100 jier yn libben – wrâlden fan poëzy

myn monolooch ferdûbelet him ta in petear – ik wol dy sizze

hoe’t ik dat earste aai bewûnderje – it ljipaai fan dyn libben

 

bist foar ’t earst op ‘e trein stapt – yn ‘t troupak nei Ljouwert

it aai lottere, yn in skaaltsje seachmoal – oan in reade bûsdoek

op it Provinsjehûs wiest even Kening – de Kommissaris hofnar

 

20 gûne ljipaai-jild joech romte – in sulverrinkje foar de frou

 

 

Josse de Haan, Hendaye – Maijos Baita – France. (july 2011).

 

Dit gedicht oer myn pake Jehannes is yn maart 2012 ferskynd yn: Pieter Breuker, Kostelijke Koopwaar, Wijdemeer. En yn 2013 yn: Josse de Haan, Frozen moonlight yn myn hannen, Elikser. Pieter Breuker hat earjuster in nij boek publisearre oer it aaisykjen mei de titel: Ljip en aai yn hert en holle, Wijdemeer. No’t it aaisykjen sa’t it liket foargoed foarby is, kinne fersen en boeken oer dy folkssport de herinnering yn libben hâlde.